30/10/09

Coop57 Galicia aproba duas novas operacións de financiamento ético e solidario

Coop57 Galicia aprobou durante o mes de Outubro duas novas operacións de financiamento ético e solidario coas cooperativas Arbore e Intergal, socias fundadoras da Sección Territorial. As devanditas operacións consistiron en préstamos en concepto de anticipo de subvencións da Xunta de Galiza por importe total de 13.000,00 € a un prazo entre catro e cinco meses. No caso de Intergal, a devandita operación, por importe de 7.000,00 € pretende cofinanciar os gastos correspondentes a un estudo estratéxico do sector de desenvolvemento e consultoría de aplicacións informáticas. Pola súa parte, Arbore solicitou a operación por un total de 6.000,00 €, para facer fronte aos gastos de actividades de fomento do cooperativismo e de implantación de tecnoloxías da información e as comunicacións.

Arbore é unha cooperativa de consumo responsábel, pioneira en Galiza no ámbito da alimentación agroecolóxica e de produtos para o fogar. Constituida en 2001 e con sede en Vigo, conta nesta altura cun total de 286 socias consumidoras. Para alén da subministración de produtos, desenvolve un importante traballo de difusión e concienciación social nos ámbitos da economía social e solidaria, e do consumo responsábel e o comercio xusto.

Intergal é unha cooperativa de traballo, constituida en 1999 e con sede en Vigo. Asocia a un total de cinco socios e socias traballadoras, que realizan a súa actividade no ámbito dos servizos integrais de novas tecnoloxías e internet. A Cooperativa está especializada na integración de vellas aplicacións nas novas tecnoloxías, en ferramentas para xerar programas e aplicacións e-business, na explotación remota de aplicacións (ASP) e no aloxamento e servizos de desenvolvemento para empresas e usuarios a través de internet.

Coop57 Galiza desde a súa constitución o pasado mes de Maio, ten aprobado tres proxectos de financiamento ético e solidario por un montante total de 35.000,00 €. Neste altura asocia a 16 organizacións da economía social e solidaria e 40 socios e socias colaboradoras que achegan á Sección Territorial un total de 43.800,00 €.

Ler mais...

26/10/09

Enric Durán en Galicia


Enric Durán Giralt, o activista social catalán coñecido no ano 2008 logo de expropiar 492.000 euros a 39 entidades bancarias mediante créditos ao consumo, estará entre os días 26 e 31 de outubro en distintos puntos de Galiza. 
Os cartos foron investidos na creación dunha infraestrutura de movemento, que supuxo dende a formación das publicacións CRISI e PODEM!, ambas cunha tirada de 350.000 exemplares, xornais gratuítos e colectivos que conteñen información sobre o decrecemento e os movemento antisistema, e a celebración do día de desobediencia e folga de bancos 17-S (17 de setembro) ata diferentes proxectos desta índole. 
Tras 2 meses en prisión preventiva e á espera de xuizo, Durán prosegue a loita anticapitalista cunha serie de palestras en Galiza.


PALESTRAS:
Luns 26 de outubro,
20h, CS Sem um cam, rua do Vilar 9, OURENSE
Martes 27 de outubro, 20.30h, CS A Revolta, rua Real 32, rês-do-chao. Zona Velha, VIGO
Mércores 28 de outubro, 19.30h, CNT, rúa García Prieto, 24-28, COMPOSTELA

Xoves 29 de outubro, 20.30h, CSO Casa das Atochas, rúa Atocha Alta, 14, Montealto, A CORUÑA

ASEMBLEAS:
30/31 de outubro, 17h, CS Atreu, rua San Xosé, 2, baixo, Montealto, A CORUNHA 


Máis información:
http://www.sincapitalismo.net/

Ler mais...

21/10/09

Elinor Ostrom, un Nobel de Economía ben gañado

Felicitacións aos señores directores do Banco de Suecia e da Academia Sueca de Ciencias. Esta vez acertaron ao lle dar o premio 2009 a Elinor Ostrom. Xa era tempo que se llo desen a unha socioeconomista progresista, en lugar de llo regalar a algún ideólogo cavernícola, coma nos teñen acostumados a facer. Tamén era tempo de que galardoaran a unha muller, a primeira desde 1982, ano en que premiaran á socióloga Alva Myrdal.
Cal é o principal mérito académico da doctora Ostrom, profesora na Indiana University? Que estudou e propiciou a autoxestión do ben común. Por que importa este aspecto da súa obra? Porque foi ignorado por case que todos os economistas políticos, non soamente polos vellos coñecidos da dereita.
Noraboa, profesora Ostrom, por contribuír a resaltar o lado anxelical da bestia humana, e por desprestixiar á economía e a filosofía políticas que dan por sentado que todas as persoas somos rapiñadoras e carroñeiras. Era tempo de que o premio Nobel o gañase quen cre que a economía e a política poden ser beneficiosas para a maioría se reemprazan o pesimismo de Hobbes polo optimismo de Rousseau.
Fonte

Ler mais...

9/10/09

Xornada de REAS

O próximo 23 de Outubro celébrase en Madrid unha Xornada sobre Crise e Econocartel REASmía Solidaria organizada por REAS na que se desenvolverán talleres, conferencias e grupos de traballo no que atinxirán diversas temáticas e alternativas á crise desde a Economía Social e Solidária.

A seguir incluimos máis información da mesma e animámosvos a participar.

Ler mais...